DOM Zef BICI
Lindi më 1920. Studioi në Seminarin e Jezuitëve në Shkodër, në vitin 1944 mori pjesë në dramën "Kështjella e Alkaxarit", pjesë që demaskonte krimet komuniste në Spanjë, vënë në skenë prej Dom Pjetër Grudës. Që prej vitit 1956 qe Ordinar i Dioçezit të Durrësit, shërbeu në famullinë e Tiranës deri në vitin 1965, vit në të cilin u arrestua por u lirua mbas një viti. Arrestohet përsëri në vitin 1967 kur u mbyllën kishat dhe në vitin 1968 u pushkatua nën akuzën "agjent i Vatikanit"
DOM Anton ZOGAJ
Ai lindi në Kthellë të Mirditës, por u rrit në Kosovë (Gjakovë). Mbaroi seminarin Papnuer në Shkodër (1920). U diplomua për filozofi në Trauning (Austri). U shugurua meshtar më 26.4.1932. Për meritat e tij e emëruan Sekretar pranë Ipeshkëvisë së Durrësit. Shërbeu me një devocion e besnikëri të veçantë. Në vitin 1945 komunistët e arrestuan dhe e torturuan mizorisht. Dom Anton Zogajn e pushkatuan më 31.12.1946, në Porto Romano. Pranë bregut të detit të cilin ai e donte aq shumë. Ishtë Nata e Vitit të Ri...
DOM Mark GJANI
U arrestua kryesisht se ishte besnik i Imzot Frano Gjinit.
Ka lindë më 1909 në Mirditën kreshnike. Mësimet e para i kreu në vendlindje, të mesmen në seminarin Papnuer të Shkodrës, ndërsa të lartën për teologji në Gjenovë (Itali) ku u shugurue edhe meshtar. Ka shërbyer si famullitar i Oroshit në Abacinë e Mirditës. Arrestohet në fillim të vitit 1945, sipas të thënave atë e çuan në Shpal të Mirditës, ku vuajti shumë tortura dhe dha shpirt në qelitë e sigurimit në vitin 1945. Kufoma e tij u tërhoq me karrocë rrugëve te Mirditës nga “antinjerëzit” e sistemit gjakatar komunist…
DOM Mark BICAJ
Malet e Mirditës e kishin pajisur me shkathtësinë e zogjve dhe bukurinë e luleve të pranverës. Seminari Papnuer i Shkodrës i dha fisnikërinë e shpirtit kristian. Padova e Shën Ndoit i lidhi përgjithmonë besën me Krishtin. Shugurohet meshtar në vitin 1936. Ishte vetëm një vjeç kur Shqipëria fitoi pavarsinë. Si bir i devotshëm i dha gjithçka Mirditës. Në moshën 37-vjeçare e arrestojnë dhe vdes në burgun e Shkodrës prej torturave monstruoze e antinjerzore. Mirdita do ta kujtojë gjithnjë si shembull të martirizimit.
DOM Anton DOÇi
Si të gjithë bijve të Mirditës, që zoti u kishte falë frymën e apostullimit, Seminari Papnuer i Shkodrës i fali Dom Anton Doçit kulturën e krishterë. Arrestohet në vitet e para të Diktaturës komuniste, kur nuk ishte më shumë se 30-vjeç. Faji i tij i vetëm ishte se biri i Mirditës kishte mbajt ndezun fjalën e Zotit dhe të atdhedashurisë. E çuan në kampe të ndryshme që nga kampi Ballshit deri tek kampi - krematorium i Zejmenit. Vdes në kampin e Zejmenit rreth viteve 60, si pasojë e keqtrajtimeve ç'njerzëore. Vdiq në moshën 40-vjeçare mbas 10 vjetësh nëpër kampet e diktaturës komuniste.
DOM Rrok FRISKU
Qe bir i Mirditës kreshnike, i Oroshit që i dha vendit aq burra të ditur. Lindi me 1900. Mësimet e para dhe të mesme i kreu në Shkodër, të lartën në Itali , ku u shugurue prift. Shërbeu me një devocion të madh në zona të ndryshme Veriore. Pastaj Komunistët e arrestuan. Vdiq në burg aty rreth vitit 1956. Në këtë mënyrë i'u shtua dhe një martir fesë Mirditës dhe Atdheut.
DOM Nikoll LASKAJ
Kur u burgos në vitin 1946, ishte në kulmin e veprimtarisë meshtare. I dha gjithçka Mirditës së tij të shtrenjtë, deri sa në moshën 50-vjeçare, komunistët e ndanë përgjithmonë prej saj. Akuza:- Ushtar i Krishtit që lufton antinjeriun.
Trup shkurtër dhe i dobët fizikisht, por shpirti i tij ishte i frymëzuar me zjarrin e martirizimit dhe dashurisë për njeriun. Për ata që e njohën ai rritet gjithnjë si personifikim i mendjes së hollë në urtësinë Mirditore. U lind në vitin 1898 në një familje me tradita besimi dhe trimërie. Vdiq në kampin e Bedenit. Vëllezërit e tij, në mes të terrorit, arritën t'i marrin eshtrat e tij dhe ti kthejnë në Mirditën e tij të dashur.
|
